Origin & History

Achalakha Hauri Haurang da theiva kasa ishi Tangkhul ngalei hili kha avava hi ningkhan (Sovereign Village) sada okthuida leikasa atam chitharan, ramphat kachivawui awunga ngavada kala khawui Hangashim ngavalaga shimpan rampanwui mawunphun akui sada khapan leikasa atamli, kha akhamang ma-okthui kapai leihaoda, Luiyan ngava ngarok haowa kala chilli langda luiyan kayakhawui khangarumwui hak-khamei yan semkhuilaga okthuisai, athumbing chiya:-

Somkongyan, Shongfa yan, Vara yan hikatha hina. Yanbing hiwui leingapha Somsai apamli sasai. Yan hi kaikahai eina zingkum shakha makashikhawui thili 1921 li Shangyang Shaizana thanda “Education Fund” kaho Tangkhul kha-ung katongawui khangaruma organisation akha lingkai. 1947-48 khara eina “Education Fund” kaji chi “Tangkhul Long” onthui haowa. Tangkhul Long hiwui khare President chi Shangyang Shaizana sai. Tangkhul Long hoda leikasa Long chi aruihonwui atamli Tangkhul Naga Long kaji eina zatnada lei.

1948 atamli leikasa Tangkhul Long Riyan chi review salaga 1986li Tangkhul Naga Long Riyan kaji eina zatnathui haowa, kala chi review salaga aja 8th October 2005 wui eina Riyan hi zatna kahaina.

Tangkhul Luiyamli khalei kha-ung zaikora, awo ayiwui thotwui eina leirakasa ngalei, luiyam makanshokta panda khalei kha-ung zaikora kala longnao zaikora, Tangkhul ruichumnao zaikoraasa akai akha sada okthuirum khavai kala Tangkhul Naga Longwui mikyanli ramei maranao, khararnao, naoshinao, kashang kacham khangai, shanao mayarnao makhai mana ngaraikacha mikyan eina yangmirada Long hi semkakana.

Tangkhul Luiyamli khalei mi zaikora asa akai akha sada panrumkhavai, Tangkhul Naga Long, Longphang, kha, kathum hina shimphung sada semkakana. Shimphung hiwui organs kathum eina otngarut otsin phungmi chiya :- Longshim, Phungva, kalangshim kathum hina.

Riyan hiwui alungli zangda khalei Akhum, Article, clause zaikora, Riyanyungwui kharin chiwui eina makaila kapi kahaina. Khipa khipakhana Riyan hi kakhalay chitharan, kakai kakakshong mavala khangakumshong yuivalaga khalatser khavai kapi kahaina. Khavat leisalala khamtha eina sakhuikhavai Riyan hiwui kharina. Riyan hi Tangkhulwui documentna, principlena kala shongzana. Kalikha khavat zangsalala Amendment eina khayeimaman khavai kasana phameira. Riyan Amendment kasawui processli kasak kayakha leisapai kha chiya Longshim minganingbingwui ningkasang makasang einala tarakha eina rashokpai kala phungvawui initiative einala kuirara.

Riyan kagapi hili kashap eina tangda Tangkhul tui eina khaleilei phasanglaga coin salaga kapikhavai kasali masamphang khangakan kayakha English eina shichin kahai zangkap haira. Maron maron ngarumsang khavai hotnamiserrada shitsanga, Tangkhul Longna Literature reisang khavai pandmeida ot kasa tharan, Hao laawui eina, kha khawui tui eina kala khararchan eina tui tarakha samphangra. Arui arui Tangkhul tui kagapi hili tuipa, tuiza, tuipeng kachivali akhala ngaraikacha mazangmana. Tangkhul tui kagapi chitharan standard akha eina kapiser khavai, Riyan kagapi hili kashap eina tangda Committeena hotnada kagapina, kha makapei mavakashung hiya leishonra ngarumsang mamansa. Ishi Tangkhulnaobing khamatui kagapiwui shongza akhali zatrumpai khavai hotkhana hili ichichawui kaphaning ngatei khangarok leisara chakhamei chilli maya ngarokshap khavai sasa.

Tangkhul Luiyanli okthuida khalei mi zaikorali phayamda leingarum khavai Directive principle of TNL policy Riyanli sangmi haira. Hiya Tangkhul Longna singkaphalungki kaji otngarutna da sangmi kahaina. Sak-khamataiya manotha kapaiya, sa-akha phaphalungra kajibing chi hakhuilaga sangkahaina. Hi kasa hili kashiman malei mana, kaphashong chungmei leiya kajibing kasangna. Hina Tangkhul Longwui principle sada singkaka hi khamashungana kala khangatei principle kathali langda Directive principlena thanlaga singka khavai sangkahaina. Hi singkaka chitharan Tangkhul Longwui otngarut chunghaora kala Tangkhul kathem thangkhamei zaikora ungzangra.

Riyan hina kharinva, Tangkhul ruichumnao katonga zanglaga semkaka Longna kachikatha shongfa eina khara phameithuira khala kaji hina. Ajawui Riyan hina kahanga kha khana minganin kapangkalaga Tangkhul Longshim akha leira kala hina chuimei hakmeithui kaja Tangkhulwui Decision Making Body sara.

Hili Tangkhul ruichumnao katonga zanghaira/represent sahaira, Longshim hina khamaya zaikora Tangkhulna khamayanada khuishap khavai kasana. Longnao zaikorali ngakuimi khavai, dharmarinli zatta khalei kanglupbingli ngakui khami, ruichumnao katongali ngaraikacha mikyan eina yangsang khami, ashongvali makar khami, hibing hina Apex Bodynada chitheimi.

Lt. Stephen Angkang
Convenor
TNL Riyan Review Committee

Scroll to Top